Психотроптук дарыларды сатууга шектелип 40 жаштагы аял кармалды. Бул тууралуу Бишкек шаарынын ИИББнын Басма сөз кызматы билдирди.

Маалыматка ылайык, Бишкек ШИИБна 2025-жылдын 30-декабрында Биринчи Май районунун аймагында белгисиз адамдар психотроптук жана күчтүү таасир этүүчү дары-дармектерди, ошондой эле баңгизаттарды мыйзамсыз сатып жүргөндөрү боюнча маалымат түшкөн.

Аталган факт боюнча Бишкек шаарынын Биринчи Май РИИБдин Тергөө кызматы тарабынан кылмыш иши козголгон.

“Жүргүзүлгөн ыкчам-иликтөө иш-чараларынын алкагында Власов көчөсүндөгү үйлөрдүн биринин жанынан милиция кызматкерлери тарабынан 1986-жылы туулган жаран Т.Г. кармалган. Жеке тинтүү учурунда ага таандык кара түстөгү сумкадан психотроптук, күчтүү таасир этүүчү дары-дармектин 214 таблеткасы табылган. Кармалган жаран айтымында, аталган дары-дармектерди ал Ош базарынан сатып алып, дарыгердин дайындоосуз жана рецептисиз тааныш адамдарга бир даанасын 500 сомдон 700 сомго чейинки баада саткан. Кыргыз Республикасынын Кылмыш-процессуалдык кодексинин 96-беренесине ылайык, шектүү Т.Г. Бишкек шаарынын ИИББнын убактылуу кармоочу жайына камакка алынды”, — деп берилет маалыматта.

Учурда Бишкек шаарынын Биринчи Май РИИБдин Тергөө кызматы тарабынан бардык зарыл болгон тергөө иш-чаралары улантылууда.