Россияда эмгек мигранттарына өлкөгө үй-бүлөсүн алып келүүгө тыюу салуу пландалууда. Бул тууралуу РИА Новости жазып чыкты.
Тиешелүү мыйзам долбоорун Леонид Слуцкий башында турган ЛДПР партиясы Мамлекеттик думанын кароосуна киргизет. Анын оюнча эмгек мигранттарынын үй-бүлөсү аларды мекенинде күтүшү керек.
Аталган документте Россиянын жарандыгы жок болгон, эмгек келишим же патенттин негизинде иштеген төмөнкү квалификациядагы адистерге үй-бүлөсүн Россияга алып келүүгө тыюу салуу каралган. Эгер чет элдик жогорку квалификациядагы адис болсо, мыйзам ага тиешелүү болбойт.
«Бул жакта иштеп жаткан чет элдиктердин жакын туугандары Россияга келип, анклав болуп жашашат, өз тилинде сүйлөшөт, жергиликтүү тургундарга тоготпогондой мамиле жасашат. Мигранттар турган батирлер коммуналдык кызматтар үчүн акча төлөбөй жүрүп, чоң карыз топтоп койгон, ал маселени үй ээлери чечүүгө аргасыз болгон учурлар көп. Бул маселелердин баарын жокко чыгарып, квалификациясы жок чет элдиктерге бул жакта иштеп жаткан маалда үй-бүлөсүн алып келүүгө тыюу салуу керек. Келдиңби, иштедиңби – кайра үйүнө кайт. Башка сөз да болбош керек», — деген ал.
