Чүй облусуна караштуу «Ак-Тилек» чек ара ветеринардык көзөмөл өткөрүү жайында Россия Федерациясынан Кыргыз Республикасынын аймагына мыйзамсыз ташылып келе жаткан 15 600 литр кымыз аныкталып, артка кайтарылды.
Текшерүү чек ара ветеринардык көзөмөл пунктунун инспекторлору тарабынан жүргүзүлдү. Изилдөө учурунда продукциянын этикеткасында чыгарылган күнү көрсөтүлбөгөнү белгиленди, бул Кыргыз Республикасынын ветеринардык жана санитардык талаптарына жооп бербейт.
Аталган факт боюнча тиешелүү тартипте актылар түзүлүп, жүктү Кыргыз Республикасынын аймагына киргизүүгө тыюу салынды. Натыйжада, товар «Ак-Тилек» көзөмөл өткөрүү жайы аркылуу кайра Россия Федерациясына жөнөтүлдү.
Ветеринария, мал чарбасын өнүктүрүү, жайыт жана тоют кызматы мындай учурлар менен тыгыз иш алып барып, калк үчүн коопсуз азык-түлүктү камсыздоону улантууда.
