Жарандык активист, саясат талдоочу Руслан Акматбек: Кемпир-Абад боюнча күнөөлөнгөндөрдү актаган сот Марат Сыдыковдун чечими – Кыргызстан дагы да борбор азиялык чөлкөмдө «демократия аралы» экенин көрсөтүп, сөз эркиндиги биздин коом үчүн жогорку баалуулук бойдон сакталганын далилдеди. Өтө саясатташып кеткен маселеге сот чекит коюп, деги эле соттор Кыргызстанда өз алдынча бийлик бутагы экенин көрсөттү.
Муну менен коомдо пайда болгон касташуу бир топ жумшарат болуш керек жана келечекте бийлик менен оппозиция ортосундагы мамилени душмандык маанайда эмес, келишпес тирешүүсү жок эле, бирин бири угуп-сыйлап, түшүнүп, жаралган маселелерди пикир алмашуу жана мунасага келүү менен орнотсо боло тургандай нукка салынгандай болду. Бирок ал үчүн коомдук пикирди аныктап-талдап, бийликке түшүндүрүп, калыс жеткире турган аналитикалык уюмдар жок экени дагы көрүндү.
