Ош облусунда бардык шайлоо тилкелеринде добуш берүү өз нугунда жүрүп жатат. Бул тууралуу президенттин облустагы өкүлчүлүгүнөн билдиришти.
Саат 12:00гө карата облус боюнча 77 миң 103 шайлоочу, же 9,5 пайызы добуш берди.
Облуста жалпы шайлоочулардын саны 811 миң 903 жаранды түзүп, 511 добуш берүү тилкеси ачылган.
Жергиликтүү бийлик органдары тарабынан бардык тилкелерде электр энергиясы менен камсыздоо, интернет байланышы жана башка зарыл болгон бардык шарттар түзүлдү.
Облустун аймагындагы жалпы 1000ден ашуун милиция кызматкерлери коомдук коопсуздукту камсыз кылууда.
Белгилей кетсек, бүгүн Кыргызстанда Жогорку Кеңештин депутаттарын мөөнөтүнөн мурда шайлоо өтүүдө. Өлкө боюнча 30 көп мандаттуу округ түзүлгөн. Ар бир округдан үчтөн депутат парламентке шайланып келет. Жалпысынан Жогорку Кеңеш 90 депутаттан турат. Шайлоочулардын акыркы тизмесинде 4 млн 294 миң 243 жаран бар.
