Кыргызстандын президенти Садыр Жапаров бүгүн, 6-декабрда 56 жашка толду.
«Кабар» агенттиги президент туулган күнүн кайда жана кимдер менен тосоруна кызыгып, президенттин басма сөз катчысы Аскат Алагөзовго суроо узатты.
Аскат Алагөзов президент туулган күнүндө иш үстүндө болорун айтты.
«Мамлекет башчысы былтыркыдай эле жумушта болот. Ал туулган күндү өзгөчө өткөргөндү жактыра бербейт. Балким, жумуштан кийин үйүндө жакындары, үй-бүлөсү менен белгилеши мүмкүн», — деген ал.
Садыр Жапаров 1968-жылы Ысык-Көл облусунун Түп районуна караштуу Кең-Суу айылында туулган.
Жапаров 2021-жылдын 10-январында Кыргызстандын президенти болуп шайланып, 28-январдан тарта президенттик кызматка расмий киришкен.
