Өлкө башчы Садыр Жапаров Казакстандын «Казинформбюро» басылмасына Астана визитинин алдында кең көлөмдүү маек берди.
Маектин жүрүшүндө «Сиз мындан жарым жыл мурун президент болом деп кыялдандыңыз беле?» — деген суроого, Жапаров эл башкаруу анын балалык чагынан бери келе жаткан кыялы экенин айткан.
«Мен 4-5 класста окуган кезде, чоң энем Жогорку Советтин депутаты болчу. Ал Москвага съездге катышуу үчүн жыл сайын жөнөп калар эле. Биз чоң атам менен телевизордон дайыма ошол кездеги өлкө жетекчиси Брежневдин сүйлөгөнүн көрчүбүз. Ошондо балалык сезим менен Брежневдей эл башкаруучу болом деп кыялданчумун», — деп кошумчалаган Садыр Жапаров.
Ал кийин 2005-жылы депутат болгонун, ошондон бери ар дайым коррупция менен күрөшүп келе жатканын да айтып өткөн.
