Шайырбек Абдырахман: «Манастагы» кырк чорону – Манастын өзүнүн кырк башка мүнөзү деп чечмелесе болот. Ар башка учурда Манас ал чоролордун ар башкасын колдонот – маселени күч менен чечүү мүмкүн болсо, Манас ал жакка Чубакты жиберет, дипломатия талап болсо, андай сүйлөшүүнү Ажыбай мыкты жүргүзө алат, башка хандар Манаска каршы кутум уюштуруп жатса, Манастын тапшырмасы менен аларды бир-бири менен Кыргылчал уруштуруп салып, чыңалууну жоёт.
Карл Густав Юнгдун психология теориясында – ар бир адамда «инь» жана «ян», «ак» жана «кара», «эркек» жана «аялдын» көрөңгөсү бар деп айтылат. Кыргызда: «Атаны көргөн ок жонот, энени көргөн тон бычат», – деген сөз бар. Манас дагы кээде «ок жонуп» баатырлык кылат, кээде болсо «тон бычып» акыл калчайт жана алысты көздөгөн стратегиялык план түзөт, эки мүнөз тең анда айкалышып турат. Жалпысынан алганда, «Манас» – бул кыргыз элинин турмушунун баардык жактарын камтыган энциклопедия…
