Министрлер кабинетинин төрагасынын орун басары, УКМК төрагасы Камчыбек Ташиев Динара Муратова жана анын беш баласына биринчи жолу өздүгүн аныктаган документтерин тапшырды. Жардам сурап кайрылган аксакал Абдывап Бусурманкуловду кабыл алып, акчалай колдоо көрсөтүп, аксакалдын неберелерине белектерин ыйгарды.
Динара Муратова Алай районунун Сары-Могол айылынын 25 жаштагы тургуну. Беш баланын энеси. Ал үй-бүлөлүк шартына байланыштуу Кыргызстандын жарандыгын ала албай жүргөн. Ошол себептен балдарына дагы туулгандыгы жөнүндө күбөлүктөрү берилбей келген. Буга чейин тиешелүү кызматтарга кайрылып, эч кандай жыйынтык болгон эмес. Мындан улам атасы, Абдывап Бусурманкулов социалдык тармак аркылуу Камчыбек Ташиевге кайрылып, жардам сураган.
Бул үй-бүлө, бүгүн, 8-августта Камчыбек Ташиевдин колунан тиешелүү документтерин алышты.
Жолугушууда Камчыбек Ташиев бул үй бүлөгө 3 бөлмөлүү батир берилээрин да убада кылды.
Булак: Өткүрбек Рахманов
