Сузак районунда жол эрежесин бузган үгүтчүлөргө айып салынды. Бул тууралуу Жол кыймылынын коопсуздугун камсыздоо башкы башкармалыгынан билдиришти.
Анын айтымында, социалдык тармактарда шайлоо үгүтчүлөрү тарабынан жол кыймылынын эрежелерин бузган видео тараган. Тасмада айдоочунун жол эрежелерин сактабагандыгы байкалган.
Бул маалымат боюнча жол инспекторлору ыкчам чара көрүшүп, эреже бузган айдоочуну аныкташты. Ага карата Укук бузуулар кодексине ылайык, 1000 сом өлчөмүндө айып салынды.
Ошондой эле айдоочуга жол кыймылынын коопсуздугун сактоо боюнча түшүндүрүү иштери жүргүзүлүп, мыйзам талаптарын так аткаруу эскертилди.
