5-февралда Бишкектеги “Шератон” мейманканасында Түркия элчилигинин Соода өкүлчүлүгүнүн көмөгү менен TUKID – “Түркия-Кыргызстан” Ишкерлер, маданият, ынтымак жана достук ассоциациясынын “Кыргызстандын салык системасы: саясат жана практика” деген аталыштагы бизнес-жолугушуусу өттү.
Иш-чарага Түркиянын элчиси Ахмет Садык Доган, Кыргызстандын Экономика министрлиги менен Салык кызматынын өкүлдөрү, ошондой эле, Ассоциация мүчөлөрү менен түркиялык ири жана орто бизнестин өкүлдөрү катышты.
Иш-чаранын жүрүшүндө салык мыйзамдары жана аларды колдонуу менен байланышкан маселелер талкууланып, ишкерлер мамлекеттик органдардын өкүлдөрүнө кызыккан суроолорун берип, өз сунуштарын айтууга мүмкүнчүлүк алды.
“Түркия-Кыргызстан” Ишкерлер, маданият, ынтымак жана достук ассоциациясы 2020-жылдын 2-декабрында Түркия элчилигинин колдоосу менен түзүлгөн. Ага Кыргызстанда экономиканын ар башка тармагында иш алып барган кыргыз жана түрк ишкерлери кирет. Мүчөлөрдүн жалпы саны 60, алар – ири жана орто бизнестин өкүлдөрү. Ассоциацияга кошулгандардын саны өсүүдө.
