Түркияда мындан бир нече ай мурда кармалган мугалим Азамат Нурматов Кыргызстанга кайтты.
ТИМ ага карата колдонулган бөгөт коюу чарасы өзгөртүлгөндүгүн жана 10-декабрда Стамбулдагы Башкы консулдуктун кызматкерлеринин коштоосунда мекенине келгенин билдиришти.
«Бул иш боюнча соттук териштирүүлөр улантылууда. Стамбул аэропортунда чек ара жана миграциялык жол-жоболордон өтүү учурунда Азамат Нурматовго байланыштуу келип чыккан маселелер дипломатиялык өкүлдөрдүн көмөгү менен жөнгө салынган», — дешти министрликтен.
Эске салсак, 2025-жылдын 19-апрелинде «Маариф» фондуна караштуу (мурдагы «Себат», кийин «Сапат» деп аталган лицейлер тармагы) Кусейин Карасаев атындагы лицейдин математика мугалими, 33 жаштагы Азамат Нурмат уулу Стамбул эл аралык аба майданында кармалган. Бул окуя ал Кыргызстандан окуучуларын математика боюнча эл аралык олимпиадага алып кирип бара жатканда болгон.
ТИМ мурдараак түшүндүрмө берген. Ага таянсак, Түркияда 2016-2017-жылдары аскердик төңкөрүш болгон маалда Нурматов жатаканада жашап, ошол кезде көбүнчө Фетхуллах Гүлендин колдоочулары пайдаланган уюлдук тиркемени пайдаланып, түрк тарап ага ошонун негизинде издөө жарыялаганын айткан.
