Жамааттык коопсуздук келишими уюмунун (ЖККУ) башкы катчысы Таалатбек Масадыков Тажикстандын президенти Эмомали Рахмондун чакыруусу менен Тажикстанга иш сапары менен барды.
ЖККУнун катчылыгы билдиргендей, сапардын алкагында ал уюмдун жоопкерчилик аймагындагы тышкы чек аранын түштүк бөлүгүндөгү кырдаал менен таанышып, үч чек ара кошуунунун тилкесиндеги чек ара тозотторуна жана өткөрүү пунктуна барды.
Ошондой эле Таалатбек Масадыков Шуроабад багытындагы тоолуу жана жетүүгө кыйын аймакта курулуп жаткан чек ара жолунун курулуш иштеринин жүрүшүн жеринен көрүп чыкты.
Иш сапардын жүрүшүндө ЖККУнун башкы катчысы Тажикстандын Улуттук коопсуздук мамлекеттик комитетинин төрагасынын биринчи орун басары – Чек ара аскерлеринин командачысы Муродали Рабжадзода менен жолугушуу өткөрдү.
