Талибдер Афганистандын волейбол боюнча аялдардын улуттук курама командасынын 20 жаштагы мүчөсү Махаджабид Хакимдин башын алып, видеосун социалдык тармактарга таратышты. Бул тууралуу анын машыктыруучусу билдирген.
Маалыматка ылайык, ал клубдагы эң мыкты оюнчулардын бири болгон. Ал талибдердин спортчу аялдарды издөө рейдинин алкагында Кабулда өлтүрүлгөн. Кызды бир топ убакыт мурун өлтүрүшкөн, талибдер ата-энесин коркутушкандыктан бул маалымат ачыкка чыккан эмес. Ошондуктан өлүм жазасына кайсы күнү тартылгандыгы тууралуу так маалымат жок.
Тренердин айтымында, азыркы учурда спорт менен алектенген аялдарга Афганистанда жашоо өтө кооптуу, улуттук курамдын 2 мүчөсү гана өлкөдөн качып кетүүгө үлгүргөн. Буга чейин алардын бири Би-Би-Сиге аз дегенде бир волейболистка өлтүрүлдү деп айткан.
