Нангархар провинциясындагы Ооганстандын мамлекеттик желегин коргоого чыккан элге талибдер ок чыгарып, натыйжасында эки адам каза болду. Бул тууралуу “Al Jazeera” маалымат булагы кабарлайт.
Маалыматка ылайык, демонстранттар талибдердин имараттардагы Ооганстандын мамлекеттик желегин «Афганистан Ислам Эмиратынын» ак желегине алмаштыруу аракеттерине каршы чыгышкан. Аянттардын биринде жүрүшкө чыккандар ак желекти чечип, мамлекеттик желекти көтөрүп алышкан. Андан соң демонстранттар менен талибдердин ортосунда кагылышуу курчуган.
Желалабаддагы акцияга ондогон жарандар катышкан жана көбү талибдердин огунан жабыркап, экөө жеринде көз жумган. Ошондой эле, чагылдырууга барган бир нече тележурналист сабалган. Ушундай эле нааразычылык акциясы Хост провинциясында да өтүүдө.
Эске сала кетсек, 15 -августта радикалдуу «Талибан» кыймылы Ооганстандын бардык аймагын толук көзөмөлгө алганын жарыялаган. Ал арада Ооганстандын президент Ашраф Гани кызматтан кетти. Миңдеген качкындар өлкөдөн чыгып кетүүгө аракет кылышууда.
