Кыргыз-тажик чек арасындагы кырдаалдан Исфара шаарынын башчысы Баховаддин Баходурзодага ок тийип, жарадар болгонун «Азаттыктын» тажик кызматы кабарлайт.
Маалыматта шаар жетекчиси «Головной» суу сактагычтын башына барып, чек арадагы кырдаалды тынч жол менен чечүүгө аракет жасап жатканда ок тийгени айтылат. Тажиктердин «Азия-Плюс» агенттиги ок анын ийинине тийгенин жазды. Учурда ал Худжанд шаарындагы ооруканалардын биринде жатат.
Кыргызстандын Саламаттык сактоо жана социалдык өнүктүрүү министрлиги кыргыз-тажик чек арасындагы соңку кагылышууларда 31 кыргызстандык жарадар болуп, бир киши каза болгонун билдирүүдө.
Ал эми Тажикстандын «Ховар» улуттук агенттиги Чек ара кызматына таянып тогуз тажикстандык жаракат алганын кабарлады.
