Айыл чарба, өнөр жай жана мелиорация министри Тилек Токтогазиев эртең, 3-февралда аткарган иштери тууралуу маалымат жыйын берет. Бул тууралуу ал өзүнүн социалдык тармактагы баракчасына жарыялады.
«Урматтуу кыргызстандыктар! Колдооңуздарга чоң рахмат. Сиздердин ар бир айтылган жылуу сөзүңөр, колдоо максатында жазган каттарыңар жана чалууларыңар демиме дем кошту. Бул мен үчүн абдан жагымдуу.
Министр катары жумушка киришкен күнү мен сиздерге отчёт берем деп убада бергем. Андыктан, эртең 100 күндүн ичинде биздин команда кандай ири долбоорлорду ишке ашырганын айтып берүү үчүн маалымат жыйын беребиз. Баса, азыр мен жөнүндө, министрлик жөнүндө ар кандай ушактар айтылып жатат. Сиздерди ишенимдүү булактардын такталган маалыматтарын гана окууга чакырам», — деп жазды ал.
