Россияда согушка тартылган кыргызстандыктын иши көзөмөлгө алынды. Бул тууралуу Тышкы иштер министрлигинен билдиришти.
Министрликке «Азаттык» үналгысынын чет мамлекеттин аймагында уулунун согуштук аракеттерге катышуусу боюнча кайрылган Н. аттуу жарандын абалы тууралуу видеоматериалына байланыштуу төмөнкүлөрдү билдирет.
18-декабрда аталган жаран «Азаттык» үналгысынын журналистинин коштоосунда Кыргызстандын тышкы саясат ведомствосуна мурда Россияда эркиндигинен ажыратууга соттолгон уулун согуштук аракеттердин аймагына жөнөтүлүшүнө жол бербөө өтүнүчү менен кайрылган. Арыз ээси министрликтин Консулдук департаментинин жетекчилиги тарабынан жеке кабыл алынды. Кабыл алуунун жыйынтыгында андан тиешелүү жазуу жүзүндөгү арыз кабыл алынды.
Жарандын кайрылуусу белгиленген тартипте иштеп чыгууга алынды. Кыргызстандын Россиядагы элчилигине тиешелүү тапшырма берилди.
