Токтогул районунун Толук айылында кыштоодо калган 10 жаран 2811 баш малы менен айылга эвакуацияланды. Бул тууралуу райондук администрациядан билдиришти.
Маалыматка караганда, дагы 2 короодон мал-жандыктар менен 4 адам жолдо келе жатат. Ал эми калган 12 малчынын тамак-ашы жана тоюту жетиштүү болгондуктан көчүүдөн баш тарткан. Айыл өкмөтү тарабынан мал ээлерине эскертүүлөр берилип, түшүндүрүү иштери жүргүзүлгөн.
Эскерте кетсек, аталган аймакта кар калың түшүп, жол каттамы жабылып, натыйжада 13 короодо турган 26 жаран мал-жандыктары менен кыштоодо калып калган. Аларга Толук айыл аймагынан ат менен жардам көрсөтүүгө атчан 50 адам жөнөтүлгөн.
Учурда жолдорду тазалоого 3 техника иштеп жатат. Ички жолдор 24-декабрга чейин толугу менен тазаланып бүтөрү пландалууда. Жабыркагандар жок.
