УКМК «Кадастр» ишканасынын Бишкектеги филиалында эмнеге узун кезек жаралып жатканын аныктады.
Буга чейин аталган ишканада кезекке туруу үчүн көпчүлүктүн бир нече саат күтүүгө аргасыз болуп жатканы айтылып, абалды жөнгө салуу боюнча чечкиндүү аракеттердин жоктугуна коомчулукта нааразычылык жаралган.
УКМК каттоо бөлүмүн текшерип, эки кызматкер кыймылсыз мүлктү каттоодо акча сунуштаган кардарларды электрондук кезектен тышкары киргизип турганын аныктаган. Бул кызматы үчүн алар 2 000 сомдон 10 000 сомго чейин сый акы алып турушкан. Эки кызматкер кармалып, УКМКнын убактылуу кармоочу жайына киргизилди.
