Соцтармактарда кыргыз жарандары менен кытай жарандарынын ортосунда никелер көбөйдү делген чагымчыл жана негизсиз маалыматтар чындыкка дал келбейт. Бул тууралуу УКМКнын басма сөз кызматы билдирди.
Улуттук коопсуздук мамлекеттик комитети 2020-жылдан бүгүнкү күнгө чейин расмий түрдө катталган мындай никелердин саны болгону 129ду түзөөрүн, алардын көпчүлүк бөлүгү КЭР жарандары болуп саналган ар кандай этникалык топтордун, анын ичинде этникалык уйгурлардын, дунгандардын жана башка өкүлдөрдүн ортосунда түзүлгөнүн маалымдайт.
Ошол эле учурда, титулдук улуттун өкүлдөрү менен кытайлыктардын (ханьдар) ортосундагы никелердин саны 44тү түзөт, алардын көпчүлүгү Кытайга туруктуу жашоого кеткендер. Бул процесстер Кыргызстандагы жалпы демографиялык кырдаалга таасир этпейт.
Атайын кызмат расалык, этникалык, улуттук, диний же аймактар аралык кастыкты (пикир келишпестикти) козутууга багытталган аракеттер үчүн кылмыш жоопкерчилиги жөнүндө эскертет.
