Улуттук коопсуздук мамлекеттик комитетинин төрагасы Камчыбек Ташиев Кыргызстанга кайтып келип, дароо Баткенге учуп барды. Бул тууралуу УКМКнын басма сөз кызматы билдирди.
Маалыматка ылайык, кечээ төрага өзүнүн Фейсбук баракчасына Германияга жетип кайра Кыргызстанга кайтканын жазган.
Чек арадагы кырдаал турукташып, президенттин көзөмөлүндө экендиги айтылды.
Кыргызстанда 134 жабырлануучу медициналык жардамга кайрылып, 13 адам каза болду, анын ичинде 12 жаштагы кыз да бар.
29-апрелде кечинде Кыргызстан менен Тажикстан ок атышууну токтотуу жана аскер күчтөрүн мурдагы жайгаштырылган жерлерине алып кетүү боюнча макулдашышты.
Белгилей кетүүчү нерсе, “Головной” суу бөлүштүргүч ишканасы Кыргызстандын аймагындагы Төрткүл суу сактагычын толтурган каналдардын башатында жайгашкан.