Жалал-Абадда унаабейбаштык менен алектенген топтун мыйзамсыз аракеттерине бөгөт коюлду. Бул тууралуу УКМКдан билдиришти. Аталган топ ири суммадагы акча ойнотулган мыйзамсыз көчө жарышын системалуу түрдө өткөрүп келишкен. Ошол эле учурда унаабейбаштар коомдук тартипти жана жарандардын бейпилдигин одоно бузуп, жол кыймылына коркунуч туудурган көп сандаган өзгөчө кырдаалдарды жаратып, бир нече ирет жол кырсыктары катталган. Мына ушундай жарыштардын учурунда Жалал-Абад шаарындагы аскер бөлүктөрүнүн биринин тосмосу бузулган. Натыйжада, 2023-жылдын 2-июнунда Сузак районунун аймагында дагы бир жолу мыйзамсыз унаажарыш өткөрүү аракети токтотулуп, 34 адамдан турган топ жана 16 унаа кармалган. Бардык унаалар Жалал-Абад облусунун ИИБнын айыптоочу жайына жайгаштырылып, мыйзамсыз жарыштын катышуучуларына тиешелүү профилактикалык иш-чаралар жүргүзүлүп, административдик айып салынды.
Унаа жарышын уюштурган бейбаштар кармалды
