Улуттук телерадиоберүү корпорациясынын башкы директору Болотбек Тиллебаев Германияга болгон иш сапарынын алкагында Дойче Вил (Немис толкуну) эл аралык медиа корпорациясынын жетекчилиги менен жолугушуп, сүйлөшүүлөрдү жүргүздү.
Атап айта турган болсок, Deutsche Welle эл аралык медиасынын жетекчилиги менен сүйлөшүүнүн жыйынтыгында контент алмашуу, кадрларды окутуу маселеси каралды. DW медиа уюмунун КМШ өлкөлөрү боюнча таркатуу бөлүмүнүн башчысы Борис Банчевский менен көрсөтүүлөрдү алмашуу, сапаттуу контент сунуштоо багытында макулдашуу болду.
Ошондой эле DW академиясынын жетекчиси Лидия Ранерт менен кадрларды окутуу, адистерди жиберүү, тажрыйба алмашуу тууралуу сүйлөшүлдү. Тараптар мерчемделген иш чараларды жакынкы аралыкта жүзөгө ашырууга кызыкдарлыгын билдиришти.
