Ысык-Ата районунда жылкы уурдоого шектүүлөр кармалышты. Бул тууралуу Ысык-Ата РИИБнын басма сөз кызматы билдирди.
Маалыматка ылайык, 10-декабрь күнү 1995-жылы туулган С.К. арыз менен кайрылып, Ак-Сай айылында жайгашкан жайлоодон белгисиз бирөөлөр 1 баш жылкысын уурдап кеткенин билдирген.
Бул факты кылмыштардын бирдиктүү реестрине Жазык кодексинин 205-беренеси (Уурдоо) боюнча катталып, сотко чейинки өндүрүш иштери башталган.
Жүргүзүлгөн ыкчам иш-чаралардын натыйжасында жогорудагы кылмышка шектелип, 2000-жылы туулган Ж.А. жана 2001-жылы туулган А.А. аттуулар кармалышкан.
Шектүүлөр убактылуу кармоочу жайга камакка алынып, сотко чейинки өндүрүш иштери улантылууда.
