Чүй облусунун аймагынан уурулукка шектелген топ кармалды. Бул тууралуу облустук милициядан билдиришти.
Маалыматка ылайык, 30-март күнү Жайыл районунун Сосновка айылындагы стационардык тосмодон кылмышка шектүү жарандар кармалышкан.
«Алар бир нече уурулукка шектелип, Жалал-Абад облусунун Ноокен РИИБи тарабынан изделип жатышкан. Кармалган жарандар жүргөн унаага кароо жүргүзүү учурунда, 50дөн ашык уюлдук телефон жана 70ден ашык Самсунг жана Редми үлгүсүндөгү телефондун бош кутулары алынган.
Шектүү жарандар Жайыл РИИБине жеткирилип, териштирүү учурунда алар Ноокен жана Өзгөн райондорунан бир нече кылмыштарга тиешеси бар экендиги аныкталган. Кармалгандар 23, 22, 28, 21 жаштагы жарандар экени белгилүү болду. Учурда тергөө иштери уланууда», — деп билдиришти Чүй ОИИББинен.