Жалал-Абад шаарында «Кайырчы» рейди өткөрүлүп, 37 лөлү тектүүлөр аныкталды. Бул тууралуу Жалал-Абад ОИИБдин басма сөз кызматы билдирди.
Маалыматка ылайык, бүгүн Жалал-Абад шаардык ички иштер бөлүмү, ЖКККБ, мэрия жана социалдык коргоо бөлүмүнүн кызматкерлери тарабынан «Кайырчы» аталышындагы рейд өткөрүлдү. Анын алкагында шаар аймагындагы көчө бойлоруна, көпүрөлөргө, жер астынан өтүүчү өтмөктөргө туруп алышып, жол тыгындарын жана жарандарга ыңгайсыздык жараткан 37 лөлүлөр аныкталды. Анын ичинде 7 жашы жете элек өспүрүмдөр бар.
Тактоо учурунда алардын көпчүлүгү Ош облусунун ар кайсы аймагынан келишкендиги белгилүү болду. Рейд учурунда аныкталган жарандарга түшүндүрүү иштери жүргүзүлүп, жашаган аймактарына жөнөтүлдү.
