Жалал-Абад облусунда жеңил жүк ташуучу унааларды, жүк ташуучу электр мотоциклдерин, насосторду жана клапандарды чогултуучу завод куруу пландалууда. Бул тууралуу президенттин Жалал-Абад облусундагы өкүлчүлүгүнөн билдиришти.
Облус башчысы Абсаттар Сыргабаевдин Кытайга болгон иш сапарынын алкагында бул багыттагы инвестициялык долбоорду ишке ашыруу максатында Кытайдын “Shaanxi Qing Ju New Energy Tech Co, Ltd.” жана “Shaanxi Zhichao Industrial Development Investment Management Co., Ltd” компаниялары менен меморандум түзүлдү.
Долбоордун алдын ала болжолдуу наркы 4 млн АКШ долларын түзөт. Сыргабаев мындай иш-аракеттер Жалал-Абад облусунун экономикалык көрсөткүчтөрүн жогорулатуу, жаңы жумуш орундарын түзүү менен инвесторлорду колдоо багытында ишке ашырылып жатканын белгиледи.
