Жогорку Кеңештин депутаттары Жамал Сейдакматованын жакындарына көңүл айтты. Бул тууралуу парламенттин сайтына жарыяланды.
«Кыргыз эли орду толгус оор жоготууга учурады. 16-февралда узакка созулган оорудан кийин 82 жаш курагында кайталангыс талант, Кыргыз Республикасынын Эл артисти, Токтогул Сатылганов атындагы Кыргыз ССРинин Мамлекеттик сыйлыгынын лауреаты, III жана II даражадагы «Манас» орденинин ээси Жамал Сейдакматова дүйнөдөн кайтты.
Жамал Сейдакматова бүт өмүрүн чыгармачылыкка арнаган улуу актриса эле. Ал театр жана кино өнөрүнө эбегейсиз салым кошкон. Мына ушул оор жоготууга байланыштуу анын туугандарына жана жакындарына терең кайгыруу менен көңүл айтып, аза кайгысын тең бөлүшөбүз», — деп жазылат.
