Социалдык тармактарда жигиттин поезддин жолуна жатып алып, машинист токтотууга үлгүргөндүгү боюнча видео тараган. Бул окуя тууралуу Чүй ОИИБден маалымат беришти.
«23-октябрда Жайыл РИИБге саат 09:30 чамасында «Кыргыз темир жолу» ишканасынан билдирүү түшкөн. Анда Кара-Балтадагы Кожомбердиев көчөсүндө жүк ташыган поезд токтотууга мажбур болгону айтылган. Анда жигит темир жолго чыгып, берилген белгиге реакция кылган эмес. Териштирүүнүн жүрүшүндө 2001-жылы туулган жаран жубайы менен уруша кеткен. Ал жубайын коркутуп, өз жанын кыймакчы болуп, темир жолго чыгып алган. Поезд токтогонго үлгүргөн»,- деп берилет маалыматта.
Тергөөнүн жыйынтыгы менен тиешелүү чечим чыгарылаары айтылды.
