№100 кесиптик лицейинде «Күн панелдерин орнотуучу жана монтаждоочу» кесиби боюнча үч айлык кыска мөөнөттүү окуу программасын аяктаган угуучулар жыйынтыктоочу квалификациялык экзамен тапшырышты.
Агартуу министрлигинин маалыматына ылайык, экзамендин жүрүшүндө бүтүрүүчүлөр күн фотоэлектрдик панелдерин орнотуу, электрдик туташтырууларды жүргүзүү, жабдууларды тестирлөө жана техникалык коопсуздук эрежелерин сактоо боюнча теориялык билимдерин жана практикалык көндүмдөрүн көрсөтүштү.
Белгиленгендей, окуу программасына энергетика тармагында, анын ичинде гидроэлектр станцияларында эмгектенип жаткан адистер да катышты. Бул кайра жаралуучу энергия булактары боюнча квалификацияны жогорулатууга кызыгуу күчөп жатканын көрсөтөт.
Министрликтин маалыматына караганда, күн энергетикасы өлкөнүн энергетикалык коопсуздугун чыңдоодо жана жашыл экономиканы өнүктүрүүдө артыкчылыктуу багыттардын бири болуп саналат.
Ушуга байланыштуу №100 кесиптик лицейи эмгек рыногунун талаптарына жооп берген адистерди даярдоону улантып, теориялык билимди практикалык окутуу менен айкалыштырган заманбап билим берүү программаларын ишке ашырууда.
