Ысык-Көл облусунун Түп районунда жол инфраструктурасын өнүктүрүү багытында бир катар ири долбоорлор ишке ашырылууда. 2026-жылга бекитилген планга ылайык, район боюнча жалпы 71,7 чакырым жолго асфальт төшөө иштери каралган. Бул тууралу Транспорт министрлиги билдирди.
Маалыматка ылайык, учурда Талды-Суу-Арал унаа жолунун 10 чакырымында асфальт төшөө иштери башталды.
Ошондой эле Түп-Кеген унаа жолунун 39 чакырым тилкесинде асфальттын экинчи катмарын төшөө иштери уланууда.
Мындан тышкары, Михайловка-Николаевка-Токтоян-Сары-Тологой унаа жолунун 15,5 чакырымына асфальт төшөө пландалып, анын 10,5 чакырымы буга чейин бүткөрүлгөн.
Түп-Шаты-Ичке-Суу-Талды-Суу унаа жолунда да 7,2 чакырым жолду оңдоо иштери жүргүзүлүүдө.
Ал эми буга чейин асфальтталган Каркыра-Турук-Сары-Жаз унаа жолунда жол чийимдерин чийүү жана жол белгилерин орнотуу иштерине даярдык көрүлүп жатат.
Жол курулуш иштери Транспорт жана коммуникациялар министрлигинин көзөмөлүндө болуп, иштер белгиленген графикке ылайык аткарылып жатканы айтылды.
