1996-жылы мыйзамсыз берилген 98 млн сомдук 4 гектар жер тилкеси мамлекетке кайтарылды. Бул тууралуу Башкы прокуратуранын басма сөз кызматы билдирди.
Маалыматка ылайык, кайтарып алуу аракеттери Жалал-Абад шаардык прокуратурасы тарабынан жүргүзүлгөн. Натыйжада, Жалал-Абад шаардык мамлекеттик акимдигинин (азыркы мэрия) 1996-жылдын 22-августундагы мыйзамсыз буйругу менен аталган шаардан 4 гектар жер «А.» аталышындагы ишкерлер ассоциациясына менчик катары автосервис куруу үчүн берилип кеткендиги аныкталган.
«Текшерүүнүн жыйынтыгы менен жогоруда көрсөтүлгөн буйрукту жараксыз деп табуу жөнүндөгү шаардык прокуратуранын доо арызы бардык соттук инстанциялар тарабынан канааттандырылган. Прокурордук чара көрүү актысынын негизинде жогорудагы жер тилкеси Жалал-Абад шаарынын мэриясынын балансына кабыл алынды», — деп берилет маалыматта.
