Токтогулда милиция кызматкерлери 20 жаштагы жигитти кылмышты мойнуна алдыруу үчүн эс-учун жоготкончо сабап, дубинка менен “зордуктайм” деп коркутушкан. Бул тууралуу Кыйноолорду алдын алуу улуттук борборунан билдиришти.
Маалыматка ылайык, арыз ээсинин кароо учурунда мойнунда, көкүрөгүндө жана колдорунда көгөргөн тактар бар экени аныкталган. Айтымында, милиция кызматкерлери аны чыканактары менен көкүрөгүнө уруп, колу менен муунтуп, бир нече жолу эсин жоготкон.
“Мындай мыкаачылык менен кыйноонун максаты бир нече кылмышты мойнуна алдыруу болгон. Арыздануучу андай кылмыштарды жасабаганын айтууда» — деп берилет маалыматта.
Кыйноолорду алдын алуу улуттук борбору фактыны каттап, бардык маалыматтарды прокуратурага өткөрүп беришкен.
