Баткендин кулуну спорттун кикбоксинг түрү боюнча Ташкентте өткөн Uzbekistan Open эл аралык мелдешинде алтын медаль тагынды. 28 жаштагы спортчу Азамат Кудайбердиев ушул эле мелдешти былтыркы жылы да жеңген. Эл аралык турнирге бул ирет 24 өлкөдөн келген спортчулар катышты.
Чемпионду кичи мекенинде Баткен районунун акими баш болгон жетекчилер, ата-энеси, жакындары жана айылдаштары салтанат менен тосуп алды. Анын ийгилиги жаштарга үлгү экени айтылып, райондук мамлекеттик администрациянын ардак грамотасы тапшырылды.
Азамат Кудайбердиев спорттун кикбоксинг, бокс жана ушу-саньда түрлөрү боюнча Кыргызстандын бир нече жолку чемпиону, спорт чебери. Бир катар эл аралык мелдештердин жеңүүчүсү. Азия Биринчилигинин күмүш медалынын ээси.
Кикбоксинг боюнча Кыргызстан курама командасынын мүчөсү. Бишкек шаарындагы «Маралбек» спорт клубунда машыгат.
Учурда спортчу Түркияда өтө турган эл аралык мелдешке камданып жатат.
