Президент Садыр Жапаровдун жакынынын атын жамынып 500 миң доллар алган деген шек менен «Памир Строй» курулуш компаниясынын ээси кармалды. Бул тууралуу УКМК билдирди.
Маалыматка караганда, ал жаран 2023-жылы үлүштүк негизде башка жарандын жер тилкесине көп кабаттуу үй курууну макулдашкан. Былтыр мамлекеттик органдар аталган жер тилкени мамлекетке кайтаруу жөнүндө сотко арыз берип, турак жай аянтынын 10 пайыздык бөлүгү мамлекетке өткөн.
Мындан пайдаланып калууну көздөгөн шектүү маселени өлкө башчынын тууганы аркылуу чечем деп башка жарандан 500 миң доллар алган. УКМК анын акчаны алдап алганын тактап, камакка алды.
Учурда тиешеси бар башка адамдарды аныктоо боюнча кошумча тергөө-ыкчам иш-чаралары жүргүзүлүүдө.
