Жайыл районунда эки баш жылкы уурдап, аны сатууга аракет кылган жаран кармалды. Бул тууралуу 7-каналга Чүй ОИИБден билдиришти.
Маалыматка ылайык, 22-февралда милицияга арыз менен Р.У. аттуу жаран кайрылган. Анда, Суусамыр өрөөнүндө жайгашкан мал сарайдын ичинен жалпы баасы 500 000 сомду түзгөн эки баш айгырын жашыруун уурдап кеткен белгисиз адамдарга чара көрүп берүүнү суранган.
Бул факт Жайыл РИИБне катталып, Кылмыш жаза кодексинин 205-беренесинде көрсөтүлгөн (уурулук) кылмыштын белгилери менен кылмыш иши козголгон.
Жүргүзүлгөн ыкчам-иликтөө иштердин натыйжасында 1999-жылы туулган А.Э. аттуу жаран уурдаган айгырларды сатууга аракет жасап жаткан жеринен кармалып, убактылуу кармоочу жайга киргизилген.
Уурдалган айгырлар кылмыш иши боюнча буюм далили деп табылып, ээсине тил кат аркылуу кайтарылып берилген.
Учурда тергөө амалдары жүргүзүлүүдө.