Москвага бараткан 70тен ашуун учак кечээ, 2-ноябрда калың тумандан улам башка аэродромдорго конууга аргасыз болду. Бул тууралуу ТАСС билдирди.
Маалыматка ылайык, айрым каттамдар Санкт-Петербург, Рига, Воронеж жана Казан шаарларына багытталып, 30дан көп учакты Нижний Новгород кабыл алды. Натыйжада жүргүнчүлөргө өз рейстерин сааттап күтүүгө туура келди. Кээ бир жерлерде траптар тартыш болуп, борттогулар суу, тамак жок, чыга албай отуруп калганын айтып жатышат.
Эл социалдык тармактарга арызданып жаза башташканда гана аларды учактардан коё беришкен. Аэропортко прокуратура өкүлдөрү барышты.
Бүгүн 3-ноябрда учактардын бир бөлүгү уча алары маалым болгон.
