“Кыргыз фильм” киностудиясы «Бир туугандык жеңиш» аттуу көркөм фильмдин синопсисине сынак жарыялаган. Анын башкы каарманы мушкер Мунарбек Сейитбек уулу.
Долбоор Кыргызстан, Түркия жана Өзбекстандын биргелешкен кино продукциясы болот. Фильмдин узактыгы 90 мүнөттү түзөт. Сынакка катышуу үчүн синопсистерди 2025-жылдын 30-январына чейин тапшыруу керек. Жеңүүчүнү үч өлкөнүн өкүлдөрү кирген комиссия аныктайт.
Эске салсак, мушкер Сейитбек уулунун жеке машыктыруучусу Парижде өткөн XXXIII жайкы Олимпиадага баруу үчүн аккредитациядан өтпөй калган. Мындан улам ага өзбекстандык Акмаль Хасанов секундант болгон. Жыйынтыгында, кыргыз спортчусу финалга чейин жетип, күмүш медалга татыган.
