Унаасына жасалма номур тагып, терезелерин караңгылатып, кошумча жаркылдоочу каражаттарды орнотуп алган айдоочу кармалды. Бул тууралу ИИМдин ЖКККББнын маалымат кызматынан билдиришти.
Кечээ, 12-январда Чүй облусунун Жол кыймылынын коопсуздугун камсыздоо кызматкерлерине одоно жол эрежесин бузган “Toyota Camry” үлгүсүндөгү авто унааны кармоо боюнча маалымат келип түшкөн.
Бул маалымат боюнча Чүй облусунун жол кыймылынын коопсуздугун камсыздоо кызматкерлери ыкчам кармоо иш-чараларын жүргүзүп, аталган унааны кармашкан.
Текшерүү учурунда 2002-жылы туулган К.А аттуу айдоочу өзүнүн унаасына жалган, жасалма мамлекеттик номурду тагып жүргөндүгү, унаасынын терезелерин мыйзамсыз караңгылаткандыгы жана жаркылдоочу каражаттарды мыйзамсыз орноткондугу аныкталган.
Бул факты боюнча авто унаа айып короо жайына токтотулуп, айдоочусуна карата 45 500 сомго айып салынды.
