Кытай Саламаттыкты сактоо министрлигине 63 миллион сомго гуманитардык жардамдын кезектеги партиясын тапшырды. Бул тууралуу Саламаттыкты сактоо жана социалдык өнүгүү министрлигинин басма сөз борборунан билдиришти.
Маалыматка ылайык, гуманитардык жардамда бир жолу колдонулуучу медициналык коргоочу кийимдер, хирургиялык бир жолку стерилденген резина кол каптар, хирургиялык маскалар, медициналык бет каптар, медициналык көз айнектер, бут кийимдин бир жолу колдонулуучу жапкычтары, бир жолу колдонулуучу медициналык халаттар, бир жолу колдонулуучу медициналык баш кийимдер, ИВЛ-аппараттар, ПЦР-системасы камтылган.
Министр Алымкадыр Бейшеналиев КЭР өкмөтүнүн Кыргызстандын COVID-19 пандемиясына каршы иш-аракетине кошкон зор салымын белгилеп, кыргыз-кытай стратегиялык өнөктөштүгүнүн жогорку деңгээлдеги колдоосу жана коронавирус COVID-19 инфекциясына каршы күрөшүү боюнча милдеттенмеси үчүн ыраазычылык билдирди.
