14-сентябрь Стамбул шаарында Кыргызстандын Эгемендүүлүгүнүн 34 жылдыгына арналган салтанаттуу иш-чара өттү. Бул тууралуу Тышкы иштер министрлигинин басма сөз кызматы билдирди.
Маалым болгондой, иш-чара Кыргызстандын Башкы консулдугу тарабынан уюштурулган.
“Майрамдык кечеге Түркиянын ар кайсы аймактарынан келген эки миңге жакын мекендештер, ошондой эле жергиликтүү мамлекеттик жана муниципалдык бийлик органдарынын өкүлдөрү катышты. Бардык коноктор үчүн кечки майрамдык тамак уюштурулду”, — деп берилет маалыматта.
Иш-чараны Кыргызстандын Түркиядагы элчиси Руслан Казакбаев ачып берди жана ал мекендештерди азыркы кыргыз мамлекеттүүлүгүнүн негиздөөчүлөрү Абдыкерим Сыдыков, Иманалы Айдарбеков, Жусуп Абдрахманов, Абдыкадыр Орозбеков, Ишеналы Арабаев жана башка көрүнүктүү инсандардын салымын ар дайым эске алууга чакырды.
