Президент Садыр Жапаров бүгүн, 23-сентябрда, Нью-Йорк шаарында өтүп жаткан (Америка Кошмо Штаттары) БУУнун Башкы Ассамблеясынын 80-сессиясынын Жалпы дебаттарынын ачылышына катышты. Бул тууралуу Президенттик администрациянын басма сөз кызматы билдирди.

Дебаттар башталар алдында Мамлекет башчысын БУУнун Башкы катчысы Антониу Гутерриш тарабынан тосуп алуу аземи болуп өттү.

Дебаттардын ачылышына дүйнөнүн 195 өлкөсүнүн мамлекет башчылары жана делегациялары катышууда. БУУнун Башкы Ассамблеясынын юбилейлик сессиясы «Жакшысы — биргелешип аракеттенүү» деген ураан менен ачылды. Бул маарекелик мезгил эл аралык тынчтыкты бекемдөө, туруктуу өнүгүү жана адам укуктарын илгерилетүү боюнча биргелешкен аракеттерди туюнтат.

Президент Садыр Жапаров БУУнун Башкы Ассамблеясынын дебаттарынын биринчи күнүндө сөз сүйлөйт.

Анын кайрылуусу 23-сентябрдан 24-сентябрга караган түнү Бишкек убактысы боюнча болжол менен саат 02:00–03:00дө күтүлүүдө.

Түз эфирди УТРК каналынан жана социалдык тармактагы баракчалардан көрүүгө болот.