Нью-Йорк шаарында тышкы иштер министри Жээнбек Кулубаевдин төрагалыгы алдында Жамааттык коопсуздук келишим уюмуна мүчө мамлекеттердин тышкы иштер министрлеринин жумушчу жолугушуусу өттү.

Ведомстводон маалымдашкандай, жыйын БУУнун Башкы ассамблеясынын 80-сессиясынын алкагында өттү.

Жолугушуунун жүрүшүндө тараптар эл аралык жана аймактык коопсуздуктун актуалдуу маселелерин талкуулап, уюмдун алкагында жана БУУнун Уставында бекитилген максаттарды жана принциптерди ишке ашыруу контекстинде кызматташуунун негизги багыттары боюнча пикир алышышты.

Эл аралык тынчтыкты жана коопсуздукту сактоо, көп тараптуу кызматташтыкты чыңдоо жана терроризм, экстремизм жана трансулуттук кылмыштуулук сыяктуу заманбап коркунучтарга каршы туруу боюнча ЖККУнун аракеттерин БУУнун приоритеттери менен макулдашууга өзгөчө көңүл бурулду.

Министрлер ЖККУнун негизги принциптерине жана милдеттерине берилгендигин ырасташты, пайда болгон чакырыктарга натыйжалуу жооп кайтаруу үчүн өз ара кызматташуунун жана өз убагында маалымат алмашуунун маанилүүлүгүн белгилешти, ошондой эле БУУну кошкондо, эл аралык структуралар менен координациялоонун маанилүүлүгүн баса белгилешти.

Жолугушуунун соңунда тышкы саясий ведомстволордун башчылары коллективдүү коопсуздуктун жана аймактагы туруктуу өнүгүүнүн натыйжалуулугун жогорулатуу максатында бардык деңгээлде үзгүлтүксүз диалогду улантуу боюнча көп тараптуу уюмдар менен тыгыз кызматташууда макулдашууга жетишти.

Жыйынтыгында БУУнун түзүлгөндүгүнүн 80 жылдыгына карата ЖККУга мүчө мамлекеттердин тышкы иштер министрлеринин билдирүүсүнө кол коюлду.