2025-жылдын 1-октябрынан тартып “Коопсуз өлкө” долбоорунун алкагында орнотулган аппараттык жана программалык системалар, коопсуздук курун тагынбаган айдоочуларды жана жүргүнчүлөрдү автоматтык түрдө каттай баштайт. Бул тууралуу ИИМдин Жол кыймылынын коопсуздугун камсыздоо башкы башкармалыгынын басма сөз кызматынын жетекчиси Байказы Айтикул уулу билдирди.
Анын айтымында, мындай чара жол кыймылынын коопсуздугун жогорулатуу, эреже бузуулардын алдын алуу максатында киргизилүүдө. Мыйзам бузуулар фото жана видеокөзөмөл аркылуу аныкталып, аппараттык-программалык системалар тарабынан катталган башка мыйзам бузуулар үчүн айып пул салынат.
Кыргызстанда коопсуздук курун тагынбагандар үчүн айып пул 1000 сомду түзөт.
Ички иштер министрлиги айдоочуларды жана жүргүнчүлөрдү өз өмүрү жана коопсуздугу үчүн, жол эрежесин так сактоого, коопсуздук курун тагынууга чакырды.
