Президент балдарды жана кыз-келиндерди зордуктап, өлтүргөндөргө өлүм жазасын киргизүүнү тапшырды. Бул тууралуу өлкө башчынын маалымат катчысы Аскат Алагөзов билдирди.
Анын айтымында, мыкаачылык менен өлтүрүлгөн өспүрүм Айсулуу Мукашеванын ишин президент өз көзөмөлүнө алган.
«Президент Садыр Жапаров айрыкча жаш балдарга жана кыз-келиндерге карата кылынган кылмыштар жазасыз калбашы керек деген позицияда», — деп айтылат Алагөзовдун билдирүүсүндө.
Эске салсак, Айсулуу Мукашева 27-сентябрда түштө Барскоон айылынан Каракол шаарына чыккан боюнча дайынсыз болуп жаткан. 29-сентябрь күнү сөөгү Боом капчыгайына жакын жердеги Жел-Арык аймагынан табылып, зордукталып өлтүрүлгөнү билинген. Шектүү Бишкектен кармалып, камакка алынды.
