Бүгүн финансы министри Алмаз Бакетаев менен Сауд Өнүктүрүү фондунун башкы директору Султан Абдурахман Аль-Маршад жолугушту. Анда “Мамлекеттик мектептерди куруу (2-фаза)” долбоорун ишке ашыруу максатында 50 млн АКШ доллары өлчөмүндөгү кредиттик келишимге кол коюлду. Бул тууралуу Финансы министрлигинин басма сөз кызматы билдирди.
Маалым болгондой, алынган каражатка Бишкек шаарында 5 жаңы мектеп, 7 кошумча окуу корпусу жана Чүй облусунда 2 жаңы мектеп курулат. Бул мекемелер 150дөн 1000 окуучу чейин кабыл алууга ылайыкталат.
Министрлик бул долбоор сапаттуу билимге жетүү мүмкүнчүлүгүн кеңейтүү жана социалдык инфраструктураны өнүктүрүүгө салым кошот деп белгиледи.
