Кыргызстанда күйүүчү майдын баасы болжол менен 15 пайызга кымбатташы күтүлүүдө, деп билдирди Монополияга каршы жөнгө салуу кызматы.

Мекеменин айтымында, баанын көтөрүлүшү Орусиядагы геосаясий кырдаалга жана мунай продуктуларынын тартыштыгына байланыштуу. Натыйжада, кыргызстандык нефтетрейдерлер күйүүчү майдын көлөмүн чектеп алып жатышат, себеби орусиялык жеткирүүчүлөр кымбатыраак бааны төлөөгө даяр кардарларга биринчи беришүүдө.

Рынокту турукташтыруу үчүн кызмат Экономика жана соода министрлигине салык жүгүн (акциздик салыктар, КНС, экологиялык төлөмдөр жана башка төлөмдөр) убактылуу азайтуу, ошондой эле нефтетрейдерлерге жаңы баада күйүүчү май сатып алуу үчүн жеңилдетилген насыяларды берүү сыяктуу колдоо чараларын кароону сунуштады.

Нефтетрейдерлер Кыргызстанды күйүүчү май менен камсыздоо 2025-жылдын аягына чейин үзгүлтүксүз болорун ишендиришти.

Монополияга каршы кызмат рынокко мониторинг жүргүзүүнү жана баалардын өзгөрүшүнө анализ жүргүзүүнү улантууда.