Батыш Австралияда Уортон-Бич суусунун жээгинде таштанды чогултуп жүргөн үй-бүлө Биринчи дүйнөлүк согуш учурунда эки австралиялык жоокер тарабынан жазылган кат салынган бөтөлкөнү табышты. Бул тууралуу жергиликтүү маалымат булактары жазышууда.

Маалыматка ылайык, кат Малькольм Невилл жана Уильям Харли аттуу жоокерлер тарабынан 1916-жылдын 15-августунда жазылган. Алар 48-австралиялык жөө аскерлер батальонунун катарын толуктоо үчүн Аделаидадан Европага HMAT A70 Ballarat транспорттук кемеси менен сүзүп бара жатышкан.

Карандаш менен жазылган каттарда алар көңүлдүү экендиктерин жана жакшылыкка үмүттөнүп жатышканын билдиришкен.

«Ким муну таап алса, бизди азыркыдай бактылуу сезсин», — деп жазган Уильям.

Малькольм болсо: «Бизде баары сонун, тамактар укмуш, бир гана деңизге көмгөн бир тамактан башкасы. Толкундар тээп, чайкап жатат, бирок биз «ларридей бактылуубуз» (абдан ыраазы деген эски сөз айкашы)», — деп кошумчалаган.

Тилекке каршы, Невилл фронтто бир жылдан кийин курман болгон, ал эми Харли согуштан аман калганы менен 1934-жылы газ чабуулунун кесепетинен каза болгон.

Бөтөлкөнүн абалына караганда, ал кум дөбөлөрдүн арасында жүз жылдан ашык жаткан. Каттын тексти оңой окулгандай деңгээлде сакталып калган. Жоокерлердин туугандары бул табылганы керемет деп аташты, ал эми Невилл менен Харлинин неберелери бул ачылыш «жүз жылдан кийин алардын үй-бүлөлөрүн бириктирди» деп айтышты.