Бүгүн, 24-ноябрда президент Садыр Жапаровдун атынан Ош шаарынын мектептерине 62 даана интерактивдүү панелдер тапшырылды. Бул тууралуу Ош мэриясы кабарлайт.
Маалыматка ылайык, Ош шаарынын № 41 Х.Абдуллаев жана № 1 Федченко атындагы мектептерине президенттин атынан жалпы суммасы 12 миллион 400 миң сомдук 62 даана интерактивдүү панель тапшырылды.
Жабдууларды мэр Жеңишбек Токторбаев тапшырып, бул камкордук мугалимдер үчүн чоң мүмкүнчүлүк экенин белгиледи. Учур талабына жооп берген, мугалимдин ишин жеңилдеткен, окуучунун кызыгуусун арттырган мүмкүнчүлүктөрдү түзүп берүү – бүгүнкү күндүн негизги милдети экенин кошумчалады.
Белгилей кетсек, буга чейин 8 билим берүү мекемесине 14 интерактивдүү панель берилген. Алдыда дагы өлкө башчынын атынан заманбап жабдык менен камсыздоо улантылат.
